Psa 83 | CYM | STEP | O Dduw, paid bod yn ddistaw! Paid diystyru ni a gwneud dim!

Psalms 83

Gweddi am help i drechu'r gelynion

Cân. Salm gan Asaff.

1 O Dduw, paid bod yn ddistaw!
Paid diystyru ni a gwneud dim!
2 Edrych! Mae dy elynion di'n codi twrw.
Mae'r rhai sy'n dy gasáu di yn codi eu pennau.
3 Maen nhw mor gyfrwys, ac yn cynllwynio yn erbyn dy bobl di.
Maen nhw am wneud niwed i'r rhai rwyt ti'n eu trysori!
4 Maen nhw'n dweud, “Gadewch i ni eu difa nhw'n llwyr!
Fydd dim sôn am genedl Israel byth mwy.”
5 Maen nhw'n unfrydol yn eu bwriad,
ac wedi ffurfio cynghrair yn dy erbyn di –
6 pobl Edom a'r Ismaeliaid,
Moab a'r Hagriaid,
7 Gebal, Ammon, ac Amalec,
Philistia a phobl Tyrus.
8 Mae Asyria wedi ymuno â nhw hefyd,
i roi help llaw i ddisgynyddion Lot. ^{▼▼83:8 disgynyddion Lot Sef y Moabiaid a'r Ammoniaid. Merch hynaf Lot oedd mam y Moabiaid, a'i ferch ifancaf oedd mam yr Ammoniaid (gw. Genesis 19:30-38).}

Saib
9 Delia gyda nhw fel y gwnest ti gyda Midian ^b –
fel y gwnest ti i Sisera a Jabin,
wrth afon Cison. ^c
10 Cawson nhw eu dinistrio yn En-dor.
Roedd eu cyrff fel tail ar wyneb y tir!
11 Delia gyda'i harweinwyr nhw
fel y gwnest ti gydag Oreb a Seeb. ^d
Gwna eu tywysogion nhw
fel Seba a Tsalmwna, ^e
12 oedd am ddwyn y tir i gyd oddi ar Dduw.
13 O fy Nuw, trin nhw fel plu ysgall,
neu us yn cael ei chwythu gan y gwynt!
14 Difa nhw, fel mae tân yn llosgi coedwig,
a'i fflamau'n lledu dros y bryniau.
15 Dos ar eu hôl nhw â'th storm,
a'u dychryn nhw â'th gorwynt.
16 Coda gywilydd arnyn nhw,
a gwna iddyn nhw dy gydnabod di, O Arglwydd.
17 Cywilydd a dychryn fydd byth yn dod i ben!
Gad iddyn nhw farw yn eu gwarth!
18 Byddan nhw'n deall wedyn mai ti ydy'r Arglwydd,
ie, ti yn unig!
Ti ydy'r Duw Goruchaf sy'n rheoli'r byd i gyd!